Heimir Hallgríms: Þú spilar ekki með hausinn í bringunni gegn FH

Heimir Hallgrímsson, þjálfari ÍBV, segir að FH hafi verið of stór biti fyrir sína menn í dag. FH-ingar unnu öruggan 5-0 sigur á heimavelli sínum.

„Ég var þokkalega sáttur við spilamennskuna í fyrri hálfleiknum en við gáfum þeim aulamörk. Varnarleikurinn var svolítið barnalegur hjá okkur. Við sóttum hratt á þá en töpuðum boltanum kjánalega og þá komu þeir á okkur óskipulögðum," sagði Heimir.

„Munurinn á þessum liðum er sá að þeir hafa fullt af mönnum sem geta skorað mörk en við höfum ekki marga."

Fram að fyrsta marki leiksins hafði ÍBV fengið góð færi til að komast yfir. „Við áttum fín upphlaup og spilamennskan í fyrri hálfleik var ekki alvitlaus. Seinni hálfleikurinn var hinsvegar einstefna og maður sá hausinn á strákunum fara neðar og neðar. Þú spilar ekki með hausinn í bringunni á móti FH á þeirra heimavelli, það er alveg ljóst. Þetta var kannski of stór biti fyrir þessa peyja" sagði Heimir.

„Við eigum Fylki heima næst og verðum bara að byrja strax að einbeita okkur að því. Það þýðir ekki að dvelja við þennan leik, honum er bara lokið," sagði Heimir en liðið þarf eitt stig í viðbót til að vera öruggt með sæti sitt í Pepsi-deildinni.