„Það er gaman að vera Íslendingur" - myndir

Á meðfylgjandi myndum, sem Valgarður Gíslason ljósmyndari tók, má sjá þegar fjöldi fólks hyllti Jóhönnu Guðrúnu Jónsdóttur sem söng lagið Is It True? með dyggum stuðningi Heru Bjarkar Þórhallsdóttur, Friðriks Ómars Hjörleifssonar og Ernu Hrannar Ólafsdóttur í bakröddum í Moskvu.

Vísir hafði samband við Heru Björk og spurði út í móttökur íslensku þjóðarinnar, Moskvu og hvort hún væri nokkuð leið yfir að hafa ekki fengið að syngja fyrir Danmörku í ár.

„Gærdagurinn var æðislegur. Það var meiriháttar að koma heim og fá svona æðislegar móttökur."

„Við vorum nýkomin úr skítakulda í Moskvu. Það var ekki hægt að fá betri móttökur. Landið í sínu besta skrúða og allir brosandi," svarar Hera.

„Við erum búin að vera úti í tvær vikur og orðin pínu rússnesk. Við þurftum að sætta okkur við það að sýna passann á hverju götuhorni."

„Við komumst til að mynda ekki upp á hótelherbergin okkar nema sýna lykil og sérstakt blað sem sannaði að við værum hótelgestir. Já þetta er satt! Þetta er bara Rússland," segir Hera.

„Það var svolítið erfitt fyrir frelsishetjuna Heru frá Íslandi að koma sér fyrir í svona aðstæðum en ég gerði það bara og við vorum skemmtilegur hópur og knúsuðum hvort annað þeim mun meira."

Ertu leið yfir því að hafa ekki fengið tækifæri á að syngja fyrir Dani? „Nei ekki til! Auðvitað hefði verið frábært að fara fyrir Danmörku og fara á móti Jóhönnu Guðrúnu en það hefði verið þrælerfitt."

„Danir hefðu þá verið með í toppbaráttunni. Það er ekki efi í hjarta mínu um það. Þá hefði þjóðin eflaust klofnað og maður nennir ekki að standa í því," segir Hera hlæjandi.

Keppir þú ekki bara næst fyrir Íslands hönd? „Ég á pottþétt eftir að fara. Það er í spilunum mínum og ég vona að það verði fyrir Ísland."

„Ég fann það sterkt þarna úti að ég vil keppa fyrir Íslands hönd því ég er hreinræktaðar Íslendingur. Þjóðarstoltið er mikið og gaman að vera Íslendingur."