Óttast um hundruð manna eftir aurskriðu í Taívan

Óttast er um líf hundruð manna eftir að fjall í Taívan hreinlega gaf sig og aurskriða gróf heilt þorp á suðvesturströnd landsins í morgun.

Aurskriðan fór af stað eftir að fellibylurinn Morakot gekk yfir eyjuna um helgina.

Alls er sex til áttahundruð manns saknað eftir að aurskriðan féll, að því er breska ríkisútvarpið hefur eftir þarlendum yfirvöldum.

Flestir hinna látnu eru taldir vera eldri borgarar og börn.

Þegar hefur tekist að bjarga um fimmtíu manns frá heimilum sínum, en margir þeirra segja fjölskyldur sínar enn fastar undir leðjunni. Aðstæður til björgunarstarfs munu þó vera með versta móti, ekki síst því hluta vegakerfisins á svæðinu hefur hefur hreinlega skolað í burtu og þyrlur geta ekki lent í leðjunni.

Annarstaðar í Taívan hafa 37 dauðsföll verið staðfest eftir að fellibylurinn gekk yfir, 35 eru slasaðir og 52 saknað. Bylurinn gengur nú yfir suðurströnd Kína og hefur milljón manns flúð heimili sín, líkt og Vísir hefur greint frá.