Þingmenn fengu ekki inni á Fiskistofu

Árni Múli Jónasson lögfræðingur hefur verið skipaður fiskistofustjóri, frá 1.september til fimm ára. Frá sama tíma hefur Þórði Ásgeirssyni verið veitt lausn frá störfum að eigin ósk, en hann hefur stýrt Fiskistofu frá stofnun hennar.

Í tilkynningu sjávarútvegs- og landbúnaðarráðuneytinu kemur fram að Árni Múli er héraðsdómslögmaður og hefur meistarapróf í alþjóðlegum mannréttindalögum frá háskólanum í Lundi. Hann hefur starfað á Fiskistofu frá 1992, fyrst sem forstöðumaður veiðistjórnunarsviðs og síðan 1999 sem aðstoðarfiskistofustjóri, að frátöldum þremur árum.

Alls sóttu tólf manns um stöðu fiskistofustjóra, en þar á meðal voru fyrrverandi þingmennirnir Arnbjörg Sveinsdóttir, Sigurjón Þórðarson og Magnús Stefánsson. Sá síðastnefndi gegndi raunar stöðu félagsmálaráðherra um skeið í ríkisstjórn Sjálfstæðisflokks og Framsóknarflokks.