Sölunni á HS orku er lokið

Bæjarstjórn Reykjanes­bæjar hefur samþykkt að kaupa 32 prósenta hlut Geysis Green Energy (GGE) í HS veitum og þar með á Reykjanesbær 66,75 prósent í fyrirtækinu. Kaupverðið er 4,3 milljarðar króna. Auk þess var samþykkt að selja GGE 34 prósenta hlut Reykjanesbæjar í HS orku fyrir 13,1 milljarð króna. Hitaveitu Suðurnesja var skipt upp í tvö sjálfstæð fyrirtæki í vetur, HS veitur og HS orku. HS veitur annast dreifingu á rafmagni, hita og ferskvatni. HS orka annast orkuframleiðslu og raforkusölu.

„Ég kaupi ekki þau rök að það sé gott fyrir okkur að eiga auðlindir sem aðrir nýta. Þannig er þetta gert í þriðja heims löndunum,“ segir Guðbrandur Einarsson, bæjarfulltrúi minnihlutans í Reykjanesbæ.

„Málið var hreinlega ekki nægilega þroskað til að hægt væri að taka ákvörðun um málið,“ segir Guðbrandur. Hann segir skrítið að fulltrúar minnihlutans hafi ekki komið að undirbúningi málsins og að öll gögn hafi verið tilbúin þegar minnihluti bæjarstjórnar frétti fyrst af málinu þegar málið var tekið til afgreiðslu. Guðbrandur telur eðlilegt að það hefði verið farið í opið söluferli og ráðist í sjálfstætt verðmat á virði fyrirtækjanna tveggja. Guðbrandur lýsti einnig yfir áhyggjum af því að þegar núverandi samningur rennur út getur GGE endurnýjað samninginn einhliða til 65 ára. Því sé bærinn að afsala sér réttindum til næstu 130 ára.

„Ég er mjög ánægður með þennan samning sem ég tel mjög hagstæðan fyrir bæjarfélagið,“ segir Árni Sigfússon, bæjarstjóri Reykjanesbæjar. Hann segir að málinu sé lokið frá þeirra hlið en það séu ákveðnir fyrirvarar í samningnum sem þurfi að uppfylla. Árni segir meðal annars að núverandi eigendur hafi forkaupsrétt á hlutnum sem seldur sé til GGE. Hann telur þó afar ólíklegt að einhverjir af þeim hafi áhuga eða bolmagn til að fjárfesta í fyrirtækinu.

Einnig var samþykkt að Reykjanesbær keypti land og auðlindarétt sem áður var í eigu HS orku. Landið sem um ræðir er við Svartsengi og var kaupverðið 940 milljónir króna.

Samningarnir voru samþykktir með 7 atkvæðum Sjálfstæðisflokks gegn 4 atkvæðum A-lista.

bta@frettabladid.is