Þingmenn úr öllum flokkum leggja fram frumvarp um hópmálsóknir

Tíu þingmenn allra flokka á Alþingi hafa lagt fram frumvarp um hópmálsókn sem gerir fólki kleift að höfða sameiginlega mál til kröfu um bætur í stað þess að hver og einn fari í mál. Fyrsti flutningsmaður er Álfheiður Ingadóttir, þingmaður Vinstri grænna. Meðflutningsmenn eru meðal annars allir fulltrúar í allshverjarnefnd Alþingis.

Álfheiður segir að hópmálsókn eða fjöldamálsókn yrði nýmæli í íslenskum lögum.

,,Með því að innleiða slíkt úrræði væri réttarstaða fjölda manna bætt sem hafa svipaðar eða sams konar kröfur en þó svo lágar að þeim yrði vart fylgt eftir af einstaklingum m.a. vegna kostnaðar," segir í tilkynningu frá Álfheiði.

Þar segir jafnframt að ljóst megi vera að það sé þjóðhagslega mjög hagkvæmt að heimila hópmálsóknir í stað þess að allir sem hagsmuni kunna að eiga af niðurstöðu dómsmáls fari hver fyrir sig í mál.

Frumvarpið er hægt að lesa hér.