Kjartan Ólafsson: Vill selja listaverk bankanna

Kjartan Ólafsson, þingmaður Sjálfstæðisflokksins í Suðurkjördæmi, vill að listaverkasafnið sem nýverið komst í hendur ríkisins þegar bankarnir hrundu, verði selt. Í áskorun til forsætisráðherra segir hann að á þessum þrengingatímum þurfi Íslendingar að leita allra skynsamlegra leiða til að afla fjármagns svo ríkisvaldið geti komið til bjargar fólki og fyrirtækjum í landinu. „Nægir þar ekki að horfa eingöngu til hefðbundinna tekjustofna heldur verðum við jafnframt að leita nýrra leiða," segir þingmaðurinn.

„Í því augnamiði skora ég á þig að beita þér í því að láta selja öll þau um það bil 4.000 listaverk sem voru í eigu föllnu bankanna en eru nú í eigu ríkisins; fólksins í landinu. Þjóðin þarf á þeim fjármunum að halda sem falin eru í þessum listaverkum. Hugsanlega mætti selja þessi verk á opnum uppboðum, sem haldin yrðu með reglulegu millibili næstu misserin, eða með öðrum hætti með það að markmiði að hámarka söluandvirði verkanna," segir í áskorun Kjartans.

Hann segir að við eftirgrennslan hafi hann komist að því að líklega sé ekkert þessara verka undir einni milljón króna að verðmæti og mörg sem verðmetin hafi verið á marga tugi milljóna króna. Lauslega áætlað sýnist honum að að með þessum hætti geti þjóðarbúið fengið fjóra til átta milljarða króna og bendir Kjartan á að það séu miklir fjármunir þegar litlu er til að dreifa.

„Það sem skiptir svo ekki minna máli er að þarna er ekki um að ræða fjármuni sem færðir eru frá einni stofnun til annarrar eða aflað með niðurskurði á þjónustu hins opinbera eða lækkun launa. Þetta eru vannýttir fjármunir sem liggja að mestu í geymslum og eru þar þjóðinni til lítils yndisauka. Við höfum ekki efni á öðru en nýta þessa fjármuni eins og málum er nú háttað hjá íslensku þjóðinni," segir Kjartan og lýkur áskorun sinni á því að segja að „eðlileg forgangsröðun, í þeirri erfiðu stöðu sem við nú erum, hlýtur að miðast að því að halda bönkunum opnum, og að þeir geti veitt almenningi og fyrirtækjum eðlilega þjónustu, frekar en bankarnir safni málverkum á veggi og í geymslur."