Lögmæti Portus-kaupa kannað

Fjárlaganefnd Alþingis ákvað í gær að fá álit Ríkisendur-skoðunar á því hvort yfirtaka Austurhafnar á framkvæmdum við tónlistar- og ráðstefnuhúsið í Reykjavík samræmist lögum. Er sjónum beint að fjárreiðulögum og tilteknum heimildum í fjárlögum.

Nýverið ákváðu menntamálaráðherra og borgarstjórinn í Reykjavík að Austurhöfn tæki framkvæmdina yfir. Austurhöfn, sem er í eigu ríkis (54%) og borgar (46%), samdi á sínum tíma við Portus um hönnun, byggingu og rekstur tónlistar- og ráðstefnuhússins. Portus var í eigu Landsbankans og Nýsis sem stóðu ekki undir skuldbindingum sínum eftir bankahrunið í haust. Því tekur hið opinbera framkvæmdina í fangið.

Fulltrúar menntamálaráðuneytisins og Austurhafnar komu á fund fjárlaganefndarinnar í gær og skýrðu stöðu málsins og sín sjónarmið. Voru þeir beðnir um að útbúa skriflegar greinargerðir og afhenda nefndinni sem fyrst.

Framkvæmdir kosta á annan tug milljarða króna. Ekki hefur verið gerð grein fyrir hvernig Austurhöfn á að standa straum af kostnaði við framkvæmdirnar og þaðan af síður hefur heimilda Alþingis til fjárskuldbindinga verið leitað. Engu að síður hefur stjórn Austurhafnar veitt stjórnarformanni og framkvæmdastjóra heimild til að kaupa Portus og dótturfélög þess.

- bþs