Mikið tilstand við að leiðrétta frétt

Talsvert tilstand varð í íslensku stjórnsýslunni eftir að viðtal við Ólaf Ragnar Grímsson forseta birtist í þýska Financial Times 10. febrúar.  Fyrirsögn viðtalsins var á þá leið að innstæður Þjóðverja hjá Kaupþingi væru glataðar og var haft eftir Ólafi að þar sem Íslendingar hefðu tapað öllu væri ekki hægt að bjóða þeim upp á að þurfa að borga tap þýskra sparifjáreigenda.

Fréttin breiddist fljótt út um alla helstu fjölmiðla Þýskalands. Áhyggjufullir innstæðueigendur kröfðu þýsk ráðuneyti um aðgerðir og málið var rætt í fjárlaganefnd þýska þingsins. Fjölmargir þýskir blaðamenn leituðu viðbragða víða, meðal annars til utanríkisráðuneytis Íslands og sendiráðsins í Berlín.

Utanríkisráðuneytið, viðskiptaráðuneytið, forsetaembættið og skilanefnd Kaupþings undirbjuggu sameiginlega viðbragðsáætlun. Fólst hún fyrst og fremst í yfirlýsingum sem dreift var til fjölmiðla víða um heim. Inntak þeirra var að rangt væri eftir forsetanum haft; Ísland ætlaði að standa við samkomulag sem gert var við Evrópusambandið og nokkur aðildarríki þess í nóvember.

Þýska sendiráðinu í Reykjavík var gerð grein fyrir hinu sanna í málinu, sendiherra Íslands í Berlín ræddi við fulltrúa þýsku fjármála- og utanríkisráðuneytanna og forsetinn veitti fjölmiðlaviðtöl.

Virðist sem aðgerðir hafi borið árangur því að kvöldi þess dags sem fréttin birtist var nánast ekkert fjallað um málið í þýskum ljósvakamiðlum.- bþs