Jóhanna býst við lækkun í næstu viku

Jóhanna Sigurðardóttir forsætisráðherra gerir ráð fyrir að stýrivextir Seðlabankans verði lækkaðir í næstu viku en næsti vaxtaákvörðunardagur er fimmtudaginn 19. mars.

Í utandagskrárumræðum um endurreisn efnahagslífsins á Alþingi í gær sagði Jóhanna allar forsendur fyrir vaxtalækkun. Aukinn trúverðugleiki Seðlabankans leiddi af sér aukinn stöðugleika krónunnar og verðlags og til þess myndi peningastefnunefnd Seðlabankans taka tillit við vaxtaákvörðun.

Samhljómur var meðal þingmanna sem þátt tóku í umræðunni um nauðsyn vaxtalækkunar. Enginn gekk þó jafn langt og Guðjón A. Kristjánsson, formaður Frjálslynda flokksins, sem sagði að lækka bæri vextina úr átján prósentum í átta.

Birkir J. Jónsson, varaformaður Framsóknarflokksins, hóf umræðuna. Spurði hann ráðherra nokkurra spurninga og auglýsti um leið eftir jákvæðum viðbrögðum við efnahagstillögum Framsóknar-flokksins, einkum tillögunni um flata afskrift skulda. Hlaut hann lítil viðbrögð.

Í umræðunum upplýsti Steingrímur J. Sigfússon fjármálaráðherra að unnið væri að því að treysta undirstöður sparisjóðanna svo þeir gætu orðið máttarstólpi fjármálakerfisins.

- bþs