Öll skerðing kemur við grunnþjónustu

Í fyrirhuguðum 580 milljóna niðurskurði til leikskóla borgarinnar verður grunnþjónustan ekki skorin niður, segja fulltrúar leikskólasviðs borgarinnar.

Þessi fullyrðing er hins vegar óraunhæf, að mati Margrétar Pálu Ólafsdóttur, formanns Samtaka sjálfstæðra skóla og höfundar Hjallastefnunnar.

„Umræða um að ekki eigi að skerða grunnþjónustu er í raun óraunhæf yfirlýsing, því leikskólarnir sinna bara grunnþjónustu. Þetta er uppeldi og menntun ungra barna, gæsluhlutverk gagnvart foreldrum og máltíðir. Nánast allur kostnaður leikskóla er launakostnaður og mötuneyti. Allt annað er hverfandi. Svo mikið veit ég,“ segir hún.

Opinber skilgreining á þessu hugtaki, grunnþjónusta til leikskólabarna, er hvergi til staðar hjá borginni, staðfestir Ragnar Sær Ragnarsson, formaður leikskólaráðs. Unnið sé að skilgreiningu á vegum borgar og Sambands sveitarfélaga, „en það er ekki til beinlínis formleg skilgreining“.

Edda Björk Þórðardóttir, í foreldraráði leikskólans Hamra, lýsti þessu hér í blaðinu hinn 23. nóvember sem dæmi um metnaðarleysi hjá borginni. Í fundargerð af samráðsfundi leikskólasviðs með foreldrum leikskólabarna 12. nóvember kemur fram að fulltrúar borgarinnar hafi heitið því að tryggja grunnþjónustu.

Fulltrúarnir hafi svo staðið á gati þegar foreldrar spurðu um hvað væri grunnþjónusta.

Um fyrirhugaðan niðurskurð segist Margrét Pála skilja að reynt sé að klípa af leikskólum eins og annars staðar. „En það er erfitt að skera niður kerfi sem aldrei var í neinu góðæri. Það vita allir sem þekkja til leikskólastarfs á Íslandi að þar er alltaf haldið mjög spart á. Þess vegna finna þessar stofnanir meira fyrir niðurskurði en hinar, sem voru betur staddar í góðærinu,“ segir hún.

Þess má geta að orðið „grunnþjónusta“ er ekki að finna í lögum um leikskóla.

klemens@frettabladid.is