Engin þverpólitísk sátt í sjónmáli

Engin þverpólitísk sátt virðist í sjónmáli á Alþingi í Icesave deilunni eftir tíðindi gærdagsins og næturinnar. Þingmenn ríkisstjórnarfllokkanna höfðu vonast til þess að hægt yrði að ljúka umfjöllun um málið í fjárlaganefnd í gær. Nefnd lögfræðinga var fengin til að smíða breytingar á frumvarpi um ríkisábyrgð vegna Icesave með lagalegum og efnahagslegum fyrirvörum við málið. Settist nefndin svo á fund með fjárlaganefnd rétt upp úr klukkan þrjú í gær.

Fulltrúar í fjárlaganefnd kynntu svo stöðu málsins fyrir þingflokkunum rétt fyrir kvöldmat og kom þá í ljós að þingmönnum stjórnarandstöðuflokkanna fannst fyrirvararnir ekki ganga nægjanlega langt. Fjárlaganefnd hittist svo aftur um klukkan átta í gærkvöld og fundaði þar til klukkan var langt gengin tvö án þess að niðurstaða fengist í málið.

Fjárlaganefnd hittist aftur í hádeginu í dag en þeir stjórnarandstöðuþingmenn sem Vísir hefur talað við telja ólíklegt að sátt náist um málið ef fyrirvarar sem gerðir eru við málið ganga ekki lengra en svo að þeir rúmist innan þess samnings sem hefur verið gerður. Eins og fram hefur komið er hins vegar ekki víst að stjórnarmeirihlutinn þurfi á stuðningi minnihlutaflokkanna að halda ef forysta Vinstri hreyfingarinnar græns framboðs nær sátt um málið við Ögmund Jónasson, Guðfríði Lilju Grétarsdóttur og Lilju Mósesdóttur. Þau hafa hingað til öll lýst sig andvíg málinu.