Kalla eftir hjálp fyrir þungaðar konur sem glíma við veikindi

Ekki eru til peningar til að ljúka endurbótum á húsnæði sem hýsa á barnshafandi konur sem glíma við veikindi á meðgöngu. Stór hluti sameinaðrar meðgöngu- og sængurkvennadeildar er ónýttur vegna þessa. Ljósmóðir og læknir á deildinni kalla eftir hjálp.

Það stefnir í met fjölda fæðinga á þessu ári. Það hefur því verið erfitt að beita niðurskurðarhnífnum sem reiddur er yfir Landspítalanum á kvennadeildirnar. Í sumar var hafist handa við endurbætur á meðgöngu- og sængurkvennagangi en sá hluti hafði staðið nánast óbreyttur frá 1973.

En ekki var til nægilegt fé til að ljúka framkvæmdunum. Þær Eva Ásrún ljósmóðir og Hildur Harðardóttir læknir töldu að ekki væri lengur hægt að una við þetta ástand og hafa þær stofnað félag sem á styrkja við Kvennadeildina.

„Eftir er helmingurinn og það er áætlað að það muni kosta um 80 milljónir. Fyrsta verkefni þessa félags verður að safna þessum 80 milljónum og ljúka þessum endurbótum," segir Hildur Harðardóttir, læknir.

Plássið sem ekki tókst að laga er yfir 100 fermetrar og er það nú vannýtt, en til dæmis er ekki hægt að koma sjúkrarúmum inn í herbergin. Vannýtt herbergin skjóta skökku við á sama tíma og nýbakaðir foreldra þurfa að deila herbergjum með fleirum og konum er gert að koma sjálfar með bindi og bleiur til að nota eftir fæðinguna.

„Þetta er gamla vökudeildarhúsnæðið og það er brýnt verkefni að gera stofur svo fjölskyldan geti verið saman. Börnin eru með mæðrum sínum allan sólarhringinn og svo eru náttúrulega foreldrar sem eru með veik börn," segir Eva Ásrún Albertsdóttir, ljósmóðir.

Hún hvetur fólk til að kíkja á heimasíðuna og skrá sig í félagið. Málefni snerti allar fjölskyldur í landinu.

Upplýsingar um styrktarfélagið Líf má finna á síðunni www.styrktarfelagidlif.is