Bíræfni bílþjófurinn ákærður vegna brota sinna

Maður sem sigldi undir fölsku flaggi í nóvember á síðasta ári og gekk meðal annars undir viðurnefninu Bífræfni bílþjófurinn þarf nú að svara fyrir hegðun sína fyrir dómstólum. Maðurinn framvísaði skilríkjum sem hann hafði stolið nokkru áður á bílasölum og fékk að reynslukeyra ýmsar bifreiðar. Bílasölurnar heyrðu síðan lítið í honum og lögregla fór í málið. Hann náðist nokkrum dögum síðar í Borgarnesi. Hann er nú ákærður fyrir að hafa ekið tveimur bifreiðum í heimildarleysi og að hafa stolið hljómflutningstækjum úr annarri bifreið. Málið var þingfest í héraðsdómi Reykjaness í dag.

Málið kom upp í nóvember á síðasta ári en nokkuð var fjallað um það hér á Vísi. Upphaf málsins má reyndar rekja til 30.október á síðasta ári þegar hann stal veski frá öðrum manni. Næstu þrjár vikurnar gekk hann undir nafninu Stefán og nýtti sér skilríki mannsins til þess að sigla undir fölsku flaggi. Hann stal hverri bifreiðinni á eftir annarri og tók út vörur og þjónustu fyrir um 90 þúsund krónur á stolið kreditkort. Þar á meðal tók hann út sígarettur fyrir tugi þúsunda, greiddi hótelreikning og greiddi reikning hjá dýralækni.

Vísir ræddi við Guðna Daníelsson framkvæmdarstjóra Bílahússins í Njarðvík, en þangað mætti maðurinn og þáði kakó, bakkelsi, og hrósaði hvoru tveggja í hástert. Sagði hann jólakökuna góða og Bílahúsið gott heim að sækja. „Menn launa misjafnlega," sagði framkvæmdarstjórinn við Vísi eftir að ljóst var að maðurinn skilaði ekki ljósgráum VW Golf árgerð 2003, sem hann hafði fengið að reynsluaka.

Í kjölfar fréttar Vísis bárust fjölmargar ábendingar og sást til mannsins víða um land. Meðal annars var hann á Akranesi, Hvolsvelli og Laugarvatni. Hann var síðan handtekin í Borgarnesi eins og fyrr segir.

Þess er krafist að maðurinn verði dæmdur til refsingar og til greiðslu alls sakarkostnaðar. Einnig gerir eigandi bifreiðar, sem maðurinn stal bassahátalara, 800 watta hátölurum, Soundstorm magnara, geisladiskamöppu með 30-40 diskum og varadekki úr, kröfu um skaðabætur upp á rúmlega 200.000 krónur.