Jákvæð fyrir sameiningu Varnarmálastofnunar og Landhelgisgæslu

Ragna Árnadóttir, dóms- og kirkjumálaráðherra, telur að sameining Landhelgisgæslunnar og Varnarmálastofnunar sé einn af þeim möguleikum til hagræðingar sem verði að skoða með opnum hug. Erfitt sé að meta hvort slík sameining myndi hafa jákvæð áhrif á fjárhag Landhelgisgæslunnar. Þetta kom fram í umræðum á Alþingi í dag þegar að Sigurður Kári Kristjánsson, þingmaður Sjálfstæðisflokksins, spurði ráðherrann um boðaðan niðurskurð hjá Landhelgisgæslunni sem nýverið var tilkynnt um. Fækka þarf starfsmönnum stofnunarinnar um 20 til 30.

Ragnar sagði að þannig hátti til að hagræða verði í ríkisrekstri og þegar komi að öryggi sjómanna og annarra þurfi að fara varlega. Ragna sagðist hafa nýlega farið yfir málið með forstjóra Landhelgisgæslunnar. Í samtali þeirra hafi komið fram að flugrekstardeild Landhelgisgæslunnar sé sú deild sem minnsta skerðingu þurfi að þola. Fimm af sex þyrluvöktum verði áfram starfsræktar.

Sigurður Kári fagnaði yfirlýsingu Rögnu varðandi hugsanlega sameiningu Varnarmálastofnunar og Landhelgisgæslunnar. Hann sagði jafnframt að með uppsögnum þyrluflugmanna skerðist björgunargeta stofnunarinnar. Það væri með öllu óásættanlegt að öryggi sjómanna væri teflt í hættu með þessu hætti.

Sigurður Kári sagðist hafa öruggar heimildir fyrir því innan Landhelgisgæslunnar að þar sem ekki verði hægt að halda úti tvöfaldri þyrluvakt verði erfitt eða ómögulegt að halda uppi eftirlit úti fyrir 20 sjómílum og væri afar alvarlegt mál.