Fjárreiðustjóri Ísfélagins ósammála stjórnarformanninum

Baldvin Johnsen fjárrreiðustjóri Ísfélags Vestmannaeyja segist vera ósammála þeim orðum stjórnarformanns fyrirtækisins að hann hafi farið út fyrir heimildir félagsins eða vanrækt upplýsingagjöf til stjórnar. Baldvin og Ægi Pál Friðbertssyni, framkvæmdastjóri Ísfélagsins, var sagt upp störfum fyrr í vikunni vegna taps félagsins af afleiðusamningum.

Yfirlýsing Baldvins vegna brottvikningarinnar er svohljóðandi.

„Í kjölfar frétta og ummæla stjórnarformanns Ísfélags Vestmannaeyja Gunnlaugs Sævars Gunnlaugssonar um starfslok min hjá félaginu vil ég koma eftirfarandi á framfæri:

Ég var ráðin til starfa hjá Ísfélagi Vestmannaeyja um áramótin 2005/2006 til þess meðal annars að sjá um sjóðsstreymisvarnir félagsins. Í starfslýsingu minni stendur orðrétt um þennan hluta starfs míns: „BJ heldur utan um sjóðsstreymisvarnir félagsins og kaup og sölu gjaldeyris í samráði við framkvæmdastjóra og fjármálastjóra. Starfsmaður skal leitast við að miða þessa vinnu við að verið sé að minnka gjaldeyrisáhættu félagsins og að hún sé í samræmi við stefnu félagsins í þeim málum"

Í samræmi við ofangreinda starfslýsingu voru allir samningar varðandi gjaldeyrisvarnir félagsins gerðir með vitund og samþykki framkvæmdastjóra og/eða fjármálastjóra. Frumkvæði að gerð samninga var ýmist mitt, fjármálastjóra eða framkvæmdastjóra. Í starfi mínu fyrir Ísfélagið var ég ekki prókúruhafi fyrir félagið.

Stefna félagsins varðandi sjóðsstreymisvarnir var ekki til þegar ég hóf störf þrátt fyrir að samningar vegna slíkra varna hafi lengi tíðkast hjá félaginu fyrir mína tíð. Ég útbjó drög að stefnu félagsins í þessum málum og kom þeim drögum til framkvæmdastjóra til frekari afgreiðslu fyrir stjórn félagsins. Mér vitanlega markaði stjórn félagsins enga stefnu í þessum málum á þeim tima sem ég starfaði hjá félaginu.

Af ofangreindu er ljóst að ég hafði ekki endanlegt ákvörðunartökuvald þegar kom að gerð þessara samninga og ég get þess vegna ekki hafa farið fram yfir neinar heimildir í þeim efnum eins og fram hefur komið í fjölmiðlum.

Í starfi mínum hjá Ísfélaginu hafði ég aldrei bein samskipti við stjórn. Ég sat aldrei stjórnarfund hjá Ísfélagi Vestmannaeyja þann tíma sem ég starfaði hjá félaginu. Mér er þar af leiðandi ekki kunnugt um hvaða mál voru tekin fyrir á stjórnarfundum. Upplýsingagjöf til stjórnar var hlutverk næstu yfirmanna, fjármálastjóra og framkvæmdastjóra sem báðir sátu stjórnarfundi. Þess ber að geta að staða gjaldeyris- og afleiðusamninga kemur fram í endurskoðuðum árshluta- og ársreikningum félagsins í samræmi við hlutafélagalög.

Hvað hugsanleg mistök í starfi varðar þá hef ég án efa gert sömu mistök og allir þeir sem treystu á að bankakerfið myndi starfa áfram í sömu mynd og það hafði gert á undanförnum árum. Ég axla þá ábyrgð með því að missa starfið en ég er ekki sammála þeim orðum Gunnlaugs Sævars Gunnlaugssonar stjórnarformanns Ísfélagsins að ég hafi farið út fyrir heimildir félagsins eða vanrækt upplýsingagjöf til stjórnar og vísa ég um það til þess sem hér kemur fram að ofan.

Ég kveð Ísfélagið með söknuði, þar eignaðist ég marga góða félaga og vill ég nota tækifærið til þess að þakka þvi frábæra fólki sem starfar hjá Ísfélaginu og gerir það að því öfluga félagi sem það er."