Halda hermönnum í gíslingu

Hópur herskárra múslima sem réðst á höfuðstöðvar pakistanska hersins í borginni Rawalpindi í morgun halda innan við tíu hermönnum í gíslingu. Að minnsti kosti 12 féllu í árásinni.

Árásarmennirnir voru allir klæddir í einkennisklæði pakistanska hersins og virðast hafa ætlað að reyna að komast inn í höfuðstöðvar hans í Rawalpindi. Þeir komu akandi í hvítum sendiferðabíl og freistuðu þess að verða hleypt inn í höfuðstöðvarnar. Þegar þeir voru stöðvaðir við hliðið braust út mikill skotbardagi á milli þeirra og hermanna sem gættu hliðsins.

Átta hermenn féllu í árásinni en fjórir árásarmannanna voru skotnir til bana í átökum sem brutust út.

Árásin í morgun er rakin til þess að pakistanski herinn undibýr nú sókn inn á svæði sem talibanar stjórna að mestu við landamærin við Afganistan. Átökin á milli herskárra múslima og yfirvalda í Pakistan fara harðnandi en í gær létust 49 í borginni Peshawar eftir sjálfsmorðssprengjuárás.