Castro ánægður ákvörðun Nóbelsverðlaunanefndarinnar

Fídel Kastró, fyrrverandi forseti Kúbú, er ánægður með ákvörðun norsku Nóbelsverðlaunanefndarinnar um að veita Barack Obama Bandaríkjaforseta friðarverðlaunin í ár. Ákvörðun nefndarinnar hefur vakið furðu margra.

Flestir virðast sammála um að Obama sé hinn ágætasti maður og ekki sé ástæða til þess að efast um friðarvilja hans. Hinsvegar sé vandséð hvað hann hafi gert til þess að eiga þau skilið á þessum tímapunkti. Þjóðarleiðtogar hafa flestir brugðist kurteislega við og óskað Bandaríkjaforseta til hamingju.

Kastró er aftur á móti ánægður með ákvörðunina. Haft er eftir honum í einum af ríkisfjölmiðlum Kúbu í dag að verðlaunin séu hvatning fyrir Obama og um leið gagnrýni á utanríkisstefnu Bandaríkjanna undanfarin ár.

Kastró tók við sem forseti Kúbu eftir byltinguna árið 1959 en síðan þá hefur verið í gildi viðskiptabann Bandaríkjanna á Kúbu. Kúbverjar eru þó ekki allir á því að með kjöri Obama fyrr á árinu muni breyta nokkru stefnu stórþjóðarinnar gagnvart Kúbu.