Pólland staðfestir Lissabon sáttmálann

Forseti Póllands undirritaði Lissabon sáttmálann við hátíðlega athöfn í morgun. Tékkar eiga nú einir Evrópusambandsþjóða eftir að staðfesta sáttmálann.

Lissabon sáttmálin felur í sér töluverðar breytingar á stjórnskipan Evrópusambandsins. Verði hann staðfestur fjölgar fulltrúum á evrópuþinginu og vægi þess verður aukið. Neitunarvald ríkja í mörgum málaflokkum verður aflagt en þess í stað þarf aukinn meirihluta fyrir samþykki. Þá verður sett á laggirnar  nýtt embætti eins konar forseta Evrópusambandsins. Við stofnun þess mun forysta í ESB ekki lengur færast á milli aðildarríkja á hálfs árs fresti eins og verið hefur.

Með staðfestingu Pólverja nú í morgun hafa 26 af 27 löndum Evrópusambandsins staðfest sáttmálann. Síðasta hindrunin fyrir fylgismenn sáttmálans er Tékkland, en þar er við völd Vaclav Klaus forseti. Hann er efahyggjumaður um Evrópusambandið og andsnúinn Lissabon sáttmálanum.