Innflytjendur eru níu prósent mannfjöldans

Hinn 1. janúar 2009 voru innflytjendur á Íslandi 28.644 eða níu prósent mannfjöldans. Þetta er mikil aukning frá árinu 1996 þegar innflytjendur voru einungis 2,0 prósent landsmanna eða 5.357 alls, að því er fram kemur á heimasíðu Hagstofunnar. Á sama tímabili hefur þeim sem hafa engan erlendan bakgrunn fækkað hlutfallslega úr 93,7 prósentum í 84,6 prósent.

Að sögn Hagstofunnar var tæpur þriðjungur innflytjenda árið 1996 frá Norðurlöndunum en einungis 6,3 prósent í ársbyrjun 2009. Innflytjendum frá öðrum Evrópulöndum en Norðurlöndum hefur hins vegar fjölgað mjög á sama tímabili. „Þeir voru 39,8 prósent allra innflytjenda árið 1996 en 72,9 prósent í byrjun árs 2009. Hlutur innflytjenda frá öðrum heimsálfum en Norður-Ameríku hefur staðið í stað. Innflytjendum frá Norður-Ameríku fækkaði mikið eða úr 8,2 prósentum 1996 í 2,6 prósent árið 2009," segir einnig.

Pólverjar voru í byrjun árs langfjölmennasti hópur innflytjenda hér á landi. Alls 11.575 einstaklingar eiga uppruna í Póllandi eða 40,4 prósent allra innflytjenda. „Pólskir karlar eru tæplega helmingur allra karlkyns innflytjenda árið 2009, eða 46,2 prósent en pólskar konur eru 33,6 prósent innflytjenda kvenna. Næstflestir hafa fæðst í Litháen, 5,5 prósent, en Þjóðverjar þar á eftir, 4,6 prósent."

Að lokum er bent á að Karlar voru fleiri en konur meðal innflytjenda árið 2009, en nokkuð dró úr þeim mun frá árinu 2008. Fram til ársins 2005 voru konur þó jafnan fleiri en karlar í hópi innflytjenda.