Fótboltakappi vill verða formaður

Pétur Georg Markan, knattspyrnumaður úr Val og varaþingmaður Samfylkingarinnar, gefur kost á sér til formennsku í Hallveigu, ungum jafnaðarmönnum í Reykjavík. Pétur vakti athygli í sumar fyrir að skora mark þegar átta sekúndur voru liðnar af leik Vals gegn ÍBV.

Fram kemur í tilkynningu að Pétur vermdi 8. sæti á lista Samfylkingarinnar í Reykjavíkurkjördæmi norður fyrir Alþingiskosningarnar í vor. Áður sat hann í Stúdentaráði Háskóla Íslands fyrir hönd Röskvu á árunum 2007 til 2009 og gegndi starfi framkvæmdastjóra ráðsins 2008 til 2009. Pétur hefur jafnframt lagt stund á nám í guðfræði við Háskóla Íslands.

Aðalfundur Hallveigar fer fram annað kvöld í húsnæði Samfylkingarinnar við Hallveigarstíg. Guðrún Birna le Sage de Fontenay, núverandi formaður félagsins, gefur ekki kost á sér til endurkjörs.