Lockerbie-slysið rannsakað á ný

Skosk lögregluyfirvöld hafa tekið rannsókn Lockerbie-sprengjutilræðisins upp á nýjan leik með það fyrir augum að finna hugsanlegan vitorðsmann al-Megrahis sem hlaut fangelsisdóm fyrir tilræðið.

Tvö hundruð og sjötíu manns fórust þegar flug 103 frá Pan American-flugfélaginu fékk svipleg endalok yfir skoska smábænum Lockerbie 21. desember 1988. Sprengja í farangursrými vélarinnar sprakk og allir um borð fórust, 259 manns, ásamt ellefu á jörðu niðri. Eftir margra ára langa rannsókn og réttarhöld var Líbýumaðurinn Abdelbaset Ali Mohmed al-Megrahi dæmdur í ævilangt fangelsi fyrir tilræðið en látinn laus nýlega af mannúðarástæðum þar sem hann þjáist af krabbameini og er ekki hugað líf.

Nýja rannsóknin mun eingöngu beinast að því hvort al-Megrahi hafi haft vitorðsmann við ódæðið en Lamin Khalifah Fhimah, landi al-Megrahis, var lengi vel grunaður um að hafa verið í vitorði með honum. Hann var að lokum sýknaður. Fjórir rannsóknarlögreglumenn munu vinna að rannsókninni í fullu starfi en meðal þeirra gagna sem einkum eru til skoðunar er brot úr rafrásabretti sem talið er að hafi verið hluti af sprengjunni.