Kaupmannahöfn mun brenna í desember

Þúsundir öfgasinnaðra mótmælenda boða að Kaupmannahöfn muni brenna þegar umhverfisráðstefna Sameinuðu þjóðanna verður haldin þar ellefta til átjánda desember.

Þetta fólk er nú að safna liði á netsíðum. Mögulegt er talið að um tíuþúsund mótmælendur komi til borgarinnar meðan á ráðstefnunni stendur.

Og það þarf ekki að velkjast í vafa um boðskapinn. Á plakötum og vefsíðum eru myndir af grímuklæddu fólki með bensínbrúsa í fanginu. Einnig eru tölvugerðar myndir af turni ráðhússins í Kaupmannahöfn í ljósum logum og einnig af brennandi McDonalds stað.

Danska lögreglan þegar þegar byrjuð að þjálfa sveitir sínar fyrir stórfellda götubardaga. Mogens Lauridsen lögregluforingi segir í samtali við danska blaðið BT að óljóst sé hversu margir mótmælendur komi til borgarinnar.

Hann vonar að þeir verði sem fæstir. Lauridsen bendir á að á fundi G-8 ríkjanna í Þýskalandi árið 2007, hafi mætt um 2000 mótmælendur. Það hafi verið í júní og Kaupmannahöfn í desember sé kannski ekki eins lokkandi.

Þess beri þó að gæta að þetta verði miklu stærri og umfangsmeiri ráðstefna. Um sexþúsund og fimmhundruð lögregluþjónar verða á vaktinni í Kaupmannahöfn desemberdagana.