Heilmikil endurnýjun

„Ég er bara mjög ánægð með þetta. Þetta er auðvitað heilmikil endurnýjun," segir Katrín Jakobsdóttir, varaformaður Vinstri grænna. Katrín hreppti fyrsta sæti á lista flokksins í Reykjavík í forvali sem fór fram í gær. Hún bendir á að Svandís Svavarsdóttir kemur ný inn á þennan vettvang. Sama á við um Lilju Mósesdóttur og Ara Matthíasson „Þannig að þetta er auðvitað talsverð endurnýjun. Flott blanda af gömlu og nýju," segir Katrín.

Katrín segist ekkert vera farin að hugsa um það hvernig Vinstri grænum muni reiða af í kosningunum og í raun sé vonlaust að spá fyrir um niðurstöður kosninga. „En ég held að þetta verði allt öðruvísi kosningabarátta," segir Katrín. Hún bendir á að kosningabaráttan verði styttri og snarpari og langt sé liðið frá því að kosið var á jafn erfiðum tímum. „En ég er bara bjartsýn fyrir hönd okkar," segir Katrín.