Íkveikjan á Litla-Hrauni litin alvarlegum augum

Fangi á Litla-Hrauni reyndi að slökkva eld sem hann hafði sjálfur kveikt í klefa sínum í gærkvöldi með djús og gítar. Brotið er litið alvarlegum augum og var fanginn settur í einangrun. Agabrot í fangelsinu á Litla-Hrauni voru hátt á annað hundrað á síðasta ári.

Fregnir af eldsvoða á Litla-Hrauni í gærkvöldi urðu þess valdandi að áhyggjufullir aðstandendur fanga hringdu í forstöðumann langt fram eftir nóttu og óttuðust hið versta. Reyndin var hins vegar sú að vegna eineltismáls sem kom upp á einum ganginum voru fimm fangar lokaðir inni fyrr en vanalega og kveikti einn þeirra í ruslafötu í mótmælaskyni. Klefinn hans fylltist af reyk og reyndi hann sjálfur að slökkva eldinn með takmörkuðum árangri.

,,Kannski hefur átt að vera uppátæki sem ekki átti að fara svona langt, en það gerði það. En það var brugðist strax við og mjög litlar skemmdir. Enginn sem bar skaða af þessu. En alvarlegt að eldur sé kveiktur í húsnæði eins og þessu þar sem menn eru innilokaðir í klefum," segir Margrét Frímannsdóttir forstöðumaður á Litla-Hrauni.

Viðbrögð starfsfólk eru sögð hafa verið kórrétt, þó komu slökkvilið og lögregla á vettvang í öryggisskyni. Litið er á málið sem alvarlegt agabrot og fer lögreglan á Selfossi með rannsókn þess. Agabrot, einkum vegna fíkniefnamála, eineltis og ofbeldis eða hótana þar um eru algeng í fangelsinu.

,,Já þau eru það náttúrulega. Hert eftirlit, þannig að agabrot á síðasta ári voru yfir 180, en þess ber að geta að það er tiltölulega lítill hópur sem á langstærsta hluta þessara agabrota," segir Margrét.

Einelti er viðvarandi vandamál en hefur batnað mikið með árunum og farið minnkandi.

,,Oft á tíðum þessir kynferðisafbrotamenn sem verða fyrir þessu og svo þeir sem geta borið hönd yfir höfuð sér," segir Annþór Kristján Karlsson formaður Afstöðu félags fanga.