Forsetinn ekki enn fengið Icesavelögin

Forseti Íslands, Ólafur Ragnar Grímsson, hefur ekki enn fengið hin umdeildu Iög um ríkisábyrgð vegna Icesave-reikninganna inn á borð til sín en lögin voru samþykkt á Alþingi á föstudag. Forsetinn þarf að samþykkja lögin með undirskrift sinni líkt og öll önnur lög sem samþykkt eru á Alþingi. Samkvæmt upplýsingum frá skrifstofu forsetans hafa lögin ekki borist forsetanum og ekki er vitað hvenær svo verði.

Tæplega tíu þúsund manns hafa skorað á forsetann að samþykkja ekki lögin og þannig leyfa þjóðinni að kjósa. Forsvarsmenn síðunnar kjosa.is hafa afhent forseta undirskriftalista með áskorun þessa fólks en þetta mun vera í fyrsta skipti sem forsetinn tekur við slíkri áskorun í eigin persónu.

Samkvæmt 26. grein stjórnarskrárinnar segir að samþykki Alþingi lagafrumvarp skuli það lagt fyrir forseta lýðveldisins til staðfestingar eigi síðar en tveimur vikum eftir að það var samþykkt.

Líkt og Vísir hefur sagt frá í morgun hafa stjórnvöld hér á landi ekkert heyrt frá Hollendingum né Bretum vegna þeirra fyrirvara sem settir voru í Icesavesamningana en fjármálaráðherra býst við að svo verði í lok vikunnar.