Ríkisstjórnin bjóði erlenda fjárfesta velkomna

Virkjun við Búðarháls, milli Sultartanga og Hrauneyjafoss, hefur þá sérstöðu að víðtæk sátt ríkir um hana og öll leyfi liggja fyrir, - meira að segja ákafir umhverfissinnar hafa fagnað henni. Framkvæmdir hófust raunar fyrst fyrir átta árum þegar sprengt var fyrir stöðvarhúsinu. Þráðurinn var svo tekinn upp að nýju í fyrra, útboð auglýst og vinnubúðir fluttar á staðinn enda nánast tilbúinn orkusölusamningur við Straumsvík. En þá hrundi Ísland og allt fraus.

Á aðgerðalista ríkisstjórnarinnar í atvinnumálum frá því í vor er þetta það verkefni sem flest störf gæti skapað. Ákvörðun um þessa tuttugu milljarða króna fjárfestingu gæti því orðið vítamínsprauta. Búðarhálsvirkjun er það stórverkefni sem er líklegast til að vera næst í röðinni. Ákvörðun um að setja framkvæmdir á fullt gæti þannig orðið einskonar táknræn yfirlýsing um að botni kreppunnar sé náð og að endurreisnin sé hafin.

Eftir miklar framkvæmdir við Kárahnjúka er svigrúm Landsvirkjunar til nýrra fjárfestinga takmarkað. Í samráði við iðnaðarráðuneytið er því verið að skoða nýjar lausnir til að koma Búðarhálsi af stað. Nefnt hefur verið að lífeyrissjóðir fjárfesti í virkjuninni, kaupendur orkunnar og jafnvel verktakar.

Friðrik Sophusson, forstjóri Landsvirkjunar, nefnir í samtali við Stöð 2 verkefnisfjárfestingu og að til dæmis seljendur véla- og rafbúnaðar leggi fram fé. Hann segir menn ætla að gefa sér tíma fram til áramóta hið minnsta til að skoða leiðir en segir það skipta gríðarlega miklu máli að ríkisstjórnin sendi þau skilaboð að erlendir fjárfestar séu velkomnir til starfa á Íslandi en ekki sé farið með þá eins og boðflennur.