Lögð inn á sjúkrahús eftir tapið í úrslitunum

Breska söngstjarnan Susan Boyle hefur verið lögð inn á einkasjúkrahús eftir að hún varð aðeins í öðru sæti í hæfileikakeppninni Britains Got Talent. Úrslitin réðust á laugardaginn. Það var götudanshópurinn Diversity sem fór með sigur af hólmi. Framleiðendur hæfuleikakeppninnar sögðu að Susan Boyle væri andlega og líkamlega örmagna eftir álagið undanfarnar vikur.

Boyle sló í gegn eftir frammistöðu sína í keppninni og gekk myndband af henni að syngja manna á milli um allan heim. Í kjölfarið fékk hún mikla athygli bresku slúðurpressunnar sem fylgdi henni hvert fótmál. Hún ætlaði um tíma að draga sig út úr keppninni en keppti þó til úrslita á laugardag.