Átján ára tekinn á 180

„Hann er mjög heppinn vegna þess að hann var stöðvaður áður en hann olli sjálfum sér og öðrum skaða,“ segir Einar Magnús Magnússon, upplýsingafulltrúi Umferðarstofu.

Átján ára piltur var sviptur ökuleyfi eftir að lögregla mældi hann á 180 kílómetra hraða á Reykjanesbraut í gærmorgun. Brot drengsins er svo alvarlegt að það er komið út fyrir refsiramma umferðarbrota, samkvæmt Einari Magnúsi.

Dómari mun því skera úr um refsingu drengsins og ákvarða hversu lengi hann verður án ökuleyfis og hversu háa sekt hann þarf að greiða.

Sekt fyrir að keyra á upp að 170 kílómetra hraða er 150 þúsund krónur. Það má því gera ráð fyrir að pilturinn þurfi að greiða um eða yfir 200 þúsund krónur. - afb