Stjórnarskrárnefnd þurfti fáeina mánuði til að ljúka við störf sín

Stjórnarskrárnefnd hefði einungis þurft fáeina mánuði til viðbótar til að ljúka við störf sín. Þetta kom fram í máli Þorsteins Pálssonar ritstjóra Fréttablaðsins sem átti sæti í nefndinni. Þorsteinn og Jón Sigurðsson, fyrrverandi iðnaðar- og viðskiptaráðherra, voru gestir á Sprengisandi á Bylgjunni i morgun.

Þorsteinn sagði að stjórnarskrárnefnd sem skipuð var þegar Framsóknarflokkur og Sjálfstæðisflokkur mynduðu meirihluta í þinginu hefði ekkert starfað síðan í ársbyrjun 2007. Stjórnarskrárnefnd hafi ekki fengið neitt umboð frá ríkisstjórn sjálfstæðismanna og Samfylkingarinnar. Það hefði hins vegar ekki þurft nema hálft ár til níu mánuði til þess að hún gæti klárað sitt verk.

Þorsteinn sagði að einn stærsti ágreiningurinn í stjórnarskrárnefndinni hefði verið um auðlindamálið. Samfylkingin hafi haft mjög stífar kröfur um að settar yrðu skyldur til skattlagningar vegna nýtinga á auðlindum inn í stjórnarskrá. Í nýju ákvæði sem ríkisstjórnin hafi kynnt sé þetta grundvallaratriði farið í burtu. Samfylkingin hafi því tekið grundvallarstefnubreytingu í þessu mikilvæga máli. „Ef það hefði gerst fyrir tveimur árum þá hefði ekki þurft marga mánuði til að ljúka þessu máli," sagði Þorsteinn.

Þá sagðist Þorsteinn vera þeirrar skoðunar að einn helsti stjórnskipunarvandinn sem Íslendingar stæðu frammi fyrir væri veik staða þingsins. Hugmyndir um breytingar á stjórnarskránni núna gengu núna fyrst og fremst út á það að veika stöðu Alþingis enn frekar. „Annars vegar með því að taka frá Alþingi valdið til þess að breyta stjórnarskránni og leggja það fyrir þjóðina," sagði Þorsteinn. Hins vegar væri auðlindaákvæðið orðað svo almennt að hann óttaðist að túlkunaratriðið á því færi fyrir dómsstóla. Með því væri verið að færa valdið frá lýðræðislega kjörnum fulltrúum inn til dómsstólanna.

Jón Sigurðsson tók undir þá skoðun að í stjórnarskrá þyrfti að vera eins lítið tilefni til að túlka og mögulegt væri. Hann tók jafnframt undir það að stjórnarskrárnefnd hefði þurft fáeina mánuði til þess að ljúka við verk sitt.