Laun hækka á fyrsta ársfjórðungi

Samkvæmt vísitölu launa voru regluleg laun að meðaltali 0,8% hærri á fyrsta ársfjórðungi 2009 en í ársfjórðungnum á undan. Á sama tímabili hækkuðu laun á almennum vinnumarkaði um 0,3% að meðaltali en laun opinberra starfsmanna hækkuðu um 1,8%. Frá fyrra ári hækkuðu laun um 6,2%, þar af um 4,1% á almennum vinnumarkaði og um 11,3% hjá opinberum starfsmönnum.

Þetta kemur fram á vef Hagstofu Íslands. Þá segir að frá fyrri ársfjórðungi hafi laun skrifstofufólks hækkað mest eða um 2,4% en laun stjórnenda lækkuðu á sama tímabili um 1,7%. Frá fyrra ári hækkuðu laun verkafólks mest eða um 8,8%

Frá fyrri ársfjórðungi mældist hækkun launa í iðnaði 1,1%. Á sama tímabili lækkuðu laun í byggingarstarfsemi og mannvirkjagerð um 1,1%. Frá fyrra ári hækkuðu regluleg laun mest í iðnaði um 6,2% en laun í fjármálaþjónustu, lífeyrissjóðum og vátryggingum lækkuðu um 0,1% á sama tímabili.