Sjálfstæðisflokkurinn þríklofinn í Evrópumálum

Utanríkis- og iðnaðarráðherra segir að Sjálfstæðisflokkurinn sé óstjórntækur vegna hringlandaháttar í Evrópumálum. Flokkurinn sé að minnsta kosti þríklofinn í málinu og á stöðugu undanhaldi frá ákvörðunartöku.

Guðlaugur Þór Þórðarson þingmaður Sjálfstæðisflokksins spurði Össur Skarphéðinsson utanríkisráðherra að því á Alþingi í morgun hvers vegna Samfylkingin teldi sig hafa náð lengra með stefnu sína um aðild Íslands að Evrópusambandinu í stjórnarsamstarfi með Vinstri grænum en flokkurinn taldi sig ná í samstarfinu með Sjálfstæðismönnum. Það mætti skilja á fyrri ummælum ráðherrans að miklir sigrar hefðu unnist í þessum efnum í nýju stjórnarsamstarfi.

Össur hafði svarað því til að þær breytingar sem fyrirhugaðar væru á stjórnarskránni varðandi þjóðareign á auðlndum og tilhögun þjóðaratkvæðagreiðslna, væru forsendur fyrir því að hægt væri að sækja um aðild að Evrópusambandinu. Sigrar Sjálfstæðisflokksins í málinu hefðu hins vegar allir unnist á undanhaldinu. Hann sagðist aldrei hafa lýst því yfir að stórsigrar hefðu unnist í Evrópumálunum með samstarfinu við Vinstri græna.