Dofri vill á þing

Dofri Hermannsson, varaborgarfulltrúi, býður sig fram í 5. til 6. sæti í Reykjavík fyrir Samfylkinguna í komandi Alþingiskosningum.

,,Mikið hefur verið rætt um þörf á endurnýjun á Alþingi eftir bankahrunið og með framboði mínu vil ég leggja mitt af mörkum til að svo megi verða," segir í tilkynningu.

Dofri segist hafa beitt sér undanfarin ár fyrir umhverfisvernd og nýsköpun í atvinnumálum.

,,Á vettvangi borgarmála hef ég talað fyrir nýrri hugsun í samgöngum borgarinnar. Að auðvelda umferð gangandi og hjólandi í styttri ferðum og gera strætó að raunhæfum valkosti við bílinn í stað þess að reisa tröllauknar slaufur og láta hraðbrautir skera í sundur gróin hverfi. Með því má auka hagkvæmni í samgöngum og stuðla að auknum lífsgæðum í hverfum borgarinnar."