AGS: Efnahagsáætlun stjórnvalda gengur vel

Efnahagsáætlun stjórnvalda sem unnin er í samstarfi við Alþjóðagjaldeyrissjóðinn gengur almennt vel samkvæmt skýrslu starfsmanna sjóðsins. Skýrslan byggir á vinnu sendinefndar sjóðsins sem hér var í desember. „Megin niðurstaða hennar er sú að áætlunin gangi almennt vel, heildarmarkmið áætlunar íslenskra stjórnvalda og sjóðsins séu enn raunhæf, en nauðsynlegt er að vinna af einurð til þess að árangur náist," segir í tilkynningu.

Brýnasta verkefnið til skamms tíma var að koma ró á gengi krónunnar og hefur það gengið að mestu eftir að mati sjóðsins. „Fjárlög ársins 2009 voru einnig í samræmi við áætlunina og mótun stefnu í ríkisfjármálum til meðallangs tíma er hafin. Endurskipulagningu bankakerfisins miðar sömuleiðis í rétta átt en þar eru þó meiriháttar verkefni framundan að mati starfsmanna sjóðsins." ÞAð er í samræmi við skoðun íslenskra stjórnvalda á málinu.

„Nokkur töf hefur orðið á fjármögnun bankanna vegna þess hve viðamikla vinnu þarf að klára áður en hún verður möguleg. Frá því starfsmenn AGS voru hér í desember hefur vinnan hins vegar gengið mun betur en fram að þeim tíma." Endurskoðunarfyrirtækið Deloitte metur nú eignir og skuldir bankanna og hið alþjóðlega ráðgjafafyrirtæki.

Þrátt fyrir að aðgerðir í peningamálum hafi þegar skilað árangri telja starfsmenn AGS að enn sé of snemmt að breyta um stefnu. Með auknum stöðugleika á gjaldeyrismarkaði og í verðlagi geti skapast tækifæri til þess að losa smám saman um hömlur á fjármagnsflæði og lækka vexti í litlum skrefum.