Sparisjóðirnir yfirtaki einn af ríkisbönkunum

Birkir Jón Jónsson, varaformaður Framsóknarflokksins, vill að stjórnvöld íhugi að fela sparisjóðunum að yfirtaka einn af ríkisbönkunum þremur. Birkir greindi frá þessari afstöðu sína í utandagskrárumræðu um efnahagsmál á Alþingi fyrr í dag.

Í samtali við fréttastofu sagðist Birkir leggja mikla áherslu á það lykilhlutverk sem hann telur að sparisjóðirnir muni gegna við endurreisn efnahagslífsins.

,,Endurreisnin á að byggja á gildum samfélagslegrar ábyrðar sem þeir hafa sýnt á undanförnum áratugum. Ég vil skoða þá leið að sparisjóðirnir yfirtaki einn af ríkisbönkunum þremur. Ríkið á í fullu fangi við að reka þrjá ríkisbanka og ég tel að allir séu sammála um að ríkið eigi ekki að vera allsráðandi á fjármálamörkuðum," sagði varaformaðurinn.

Birkir telur að þessi útfærsla geti mögulega verið lausn á erfiðri stöðu fjármálastofnana til lengri tíma litið. Um leið geti hún stuðlað að hagræðingu í þeim geira sem hann telur nauðsynlegt að ná fram.