Skráir sig í Frjálslynda flokkinn - og á atvinnuleysisbætur

Vörubílstjórinn Sturla Jónsson, sem fór fremstur í flokki vörubílstjóra sem mótmæltu háu bensínverði síðasta sumar, er búinn að missa öll vinnutækin sín, auk þess sem hann skráði sig í Frjálslynda flokkinn og hyggur þar á pólitískan frama. Flokkurinn er þó ekki það eina sem hann er búinn að skrá sig í - Sturla er líka búinn að skrá sig á atvinnuleysisbætur.

Sturla ekki á sjö daganna sæla því fyrirtæki hans er komið í þrot, hann gagnrýnir Lýsingu fyrir harða innheimtu.

„Lýsing hreinsaði allt út hjá mér á föstudaginn," segir Sturla sem hefur leitað á náðir atvinnuleysissjóðs ásamt tólf þúsund öðrum Íslendingum.

Núna söðlar Sturla um því hann hyggur á frama innan Frjálslynda flokksins, þó hann sé ekki tilbúinn að gefa neitt út varðandi hugsanlegt framboð. Hann segist þó frekar vona að úr verði heldur en hitt.

„Flokkakerfið er búið að koma því þannig fyrir að ný framboð eiga sér ekki viðreisnar von í ljósi kostnaðar og tíma," segir Sturla um ástæður þess að Framafaraflokkurinn, sem hann boðaði síðasta sumar, líti ekki dagsins ljós. Hann segir það bæði kostnaðarsamt að fara í framboð auk þess sem lítill tími sé til stefnu.

„Ég sá minn hag vænstan í því að fara í Frjálslynda flokkinn," segir Sturla Hann sagðist aðspurður ekki enn hafa talað við formann Frjálslyndra, Guðjón Arnar Kristjánsson.

Sturla segir stefnumál flokksins ríma við sínar skoðanir og leggur áherslu á að þjóðfélagið sé eins og fjölskylda. Hann vill hlúa að henni með því að skipta um gjaldmiðil og koma böndum á skuldir heimilanna.