Ekki farið að reyna á sálina

Tökum á Fangavaktinni lauk fyrir rúmri viku eins og Fréttablaðið hefur greint frá. Leikararnir fengu smá frí frá þessum vinsælu karakterum en vinna við kvikmyndina Bjarnfreðar­son hófst í gær á Litla-Hrauni. Jón Gnarr bregður sér í hlutverk afa Georgs í myndinni og Páll Winkel fékk draum sinn um lítið hlutverk uppfylltan.

Eins og flestum ætti að vera kunnugt um þá er Bjarnfreðarson sjálfstætt framhald af sjónvarpsþáttaröðunum Næturvaktinni, Dagvaktinni og áðurnefndri Fangavakt en hún verður sýnd á Stöð 2 með haustinu. Þeir Jón Gnarr, Pétur Jóhann og Jörundur Ragnarsson verða því búnir að vera í þessum gervum sínum í næstum tvo mánuði þegar tökum á kvikmyndinni lýkur.

„Þetta er ekkert farið að taka á sálina, ég er náttúrlega töffari og harður nagli, aldrei hræddur við neitt og er ónæmur fyrir sársauka,“ segir Jón Gnarr. Hann viðurkennir þó að hann verði feginn þegar þessu öllu lýkur því kvikmyndin muni svo sannarlega reyna á hann.

„Ég leik nefnilega líka afa Georgs, pabba Bjarnfreðar. Það er alveg svakalegur náungi, mikið verri en Georg og hann er alveg staðráðinn í að gera mig geðveikan. Ég er svona eins og Emily Rose sem var andsetin. Nema að hún þurfti að kljást við einn djöful, ég er að berjast við tvo.“

Og Jóni líst vel á mömmu sína, eða réttara sagt mömmu Georgs, en það er Ágústa Eva Erlendsdóttir sem leikur Bjarnfreði. „Já, það er alveg stórkostlegt að eiga hana fyrir mömmu.“

Að sögn Magnúsar Viðars Sigurðssonar, framleiðanda þáttanna og kvikmyndarinnar, hefur allt gengið snurðulaust fyrir sig og þeir hafa átt gott samstarf við fangelsismálayfirvöld, fanga og fangaverði.

„Þetta hefur gengið alveg rosalega vel og allir hafa tekið okkur alveg óskaplega vel.“

Og það er kannski rétt rifja upp orð Páls Winkel fangelsismálastjóra, sem sagðist í samtali við Fréttablaðið í mars ekki vera mikill leikari en væri alveg til í að leika lítið hlutverk í þáttunum. Páll fékk ósk sína uppfyllta.

„Hann leikur dómara í knattspyrnuleik, bara lítið hlutverk en stóð sig eins og hetja.“

freyrgigja@frettabladid.is