Seðlabankinn skýri misvísandi ummæli

Orð tveggja af þremur seðlabankastjórum um mat bankans á stöðu viðskiptabankanna á síðasta ári virðast stangast á, segir Ágúst Ólafur Ágústsson, formaður viðskiptanefndar Alþingis og varaformaður Samfylkingarinnar. „Mér finnst Davíð Oddsson skulda þjóðinni frekari skýringar,“ segir Ágúst Ólafur.

Vitnað hefur verið í orð Davíðs Oddssonar, aðalbankastjóra Seðlabankans, á lokuðum fundi viðskiptanefndar Alþingis 4. desember. Þingmenn sem sátu fundinn hafa fullyrt að þar hafi Davíð sagt að hann hafi varað ráðherra við því í júní 2008 að viðskiptabankarnir myndu óhjákvæmilega falla.

Sagt er að Davíð hafi orðað það þannig að núll prósent líkur væru á því að viðskiptabankarnir lifðu af erfiðleika á fjármálamarkaði. Það hafa þó hvorki Geir H. Haarde forsætisráðherra né Ingibjörg Sólrún Gísladóttir utanríkisráðherra viljað kannast við.

Eiríkur Guðnason seðlabankastjóri sagði í viðtali við viðskiptablað Morgunblaðsins í gær að Seðlabankinn hefði aukið veðlán til fjármálastofnana á síðasta ári þar sem haldið hafi verið í vonina um að kerfið myndi standast þann ólgusjó sem á því dundi.

„Við töldum ekki fullvíst á þeim tíma að þetta myndi tapast. Síður en svo,“ hefur Morgunblaðið eftir Eiríki.

Þetta vekur óneitanlega spurningar um fyrri ummæli aðalbankastjóra Seðlabankans, segir Ágúst Ólafur. Hann skuldi þjóðinni skýringar á þessum misvísandi fréttum úr Seðlabankanum.

Enginn af bankastjórum Seðlabankans gaf kost á viðtali vegna málsins í gær. Í skriflegu svari við fyrirspurn Fréttablaðsins segir að oftúlkun sé að segja ummælin misvísandi. Þótt orð bankastjóranna séu ekki nákvæmlega þau sömu endurómi þau sama mat á stöðunni.

Í orðum Davíðs á fundi Viðskiptaráðs í nóvember fólst skýr viðvörun um stöðu mála og hvatning til að menn taki sér tak, segir í svari Seðlabankans. Ætla megi að hlutaðeigandi aðilar hafi tekið þessi orð alvarlega. Inn á þessa óvissuþætti hafi verið komið í viðtali Eiríks við Morgunblaðið.

Ríkissjóður hefur yfirtekið 345 milljarða króna kröfur Seðlabankans á fjármálafyrirtæki. Reiknað er með að um 220 milljarðar af því séu glatað fé. Þá þarf Seðlabankinn að niðurfæra eigið fé um 75 milljarða vegna lánanna.