Endurskoðendaskýrslur verða sendar sérstökum saksóknara

Skýrslur endurskoðenda um aðdraganda bankahrunsins, sem nú eru í vörslu Fjármálaeftirlitsins, verða sendar í heild sinni sérstökum saksóknara, Ólafi Þ. Haukssyni. Þetta segir Gunnar Haraldsson, formaður stjórnar Fjármálaeftirlitsins.

„Við erum í samráði við sérstakan saksóknara og erum að undirbúa að senda mál til hans þar sem skýrslurnar munu fylgja. Við erum líka að samþykkja verklagsreglur, sem við höfum búið til í samvinnu við hann, til að tryggja að mál séu unnin á sem bestan hátt," segir Gunnar.

Fjöldi mála sé í rannsókn hjá eftirlitinu og nokkur þeirra á lokastigi. Þau verði send út til sérstaks saksóknara innan skamms. „Þetta er allt mjög vel á veg komið," segir Gunnar.

Hann var spurður hvort vísbendingar, sem komi fram í þeim málum sem verða send áfram, kunni að duga til að réttlæta það að kyrrsetja eignir þeirra sem eigi í hlut. Gunnar segist ekki treysta sér til að meta það. Sérstakur saksóknari verði betur til þess fallinn, þegar þar að kemur. - kóþ