Baugur Group tekið til gjaldþrotaskipta

Stjórn Baugs Group ákvað í gær að óska eftir gjaldþrotaskiptum félagins í kjölfar synjunar Héraðsdóms Reykjavíkur á áframhaldandi greiðslustöðvun.

Í yfirlýsingu Kristínar Jóhannesdóttur, formanns stjórnar Baugs, segir að niðurstaða héraðsdóms sé mikil vonbrigði og komi mjög á óvart því stjórnin teldi félagið uppfylla öll skilyrði fyrir áframhaldandi greiðslustöðvun og að áætlanir um endurskipulagningu hafi verið raunhæfar.

„Stjórnendur og starfsmenn Baugs hafa unnið hörðum höndum við að bjarga verðmætum í fyrirtækinu í samvinnu við kröfuhafa félagsins alveg síðan í haust þegar bankakerfið hrundi á Íslandi í kjölfar lánsfjárkreppunnar. Við töldum okkur komin langleiðina með að ná samningum, sem allir hefðu getað vel við unað,“ segir í yfirlýsingu Kristínar.

Í úrskurði héraðsdóms segir að ráðagerðir Baugs Group til að endurskipuleggja félagið séu ekki raunhæfar og þar með ekki líklegar til að koma nýrri skipan á fjármál félagsins. Með því féllst dómurinn á rök skilanefndar Glitnis og Íslandsbanka, sem kröfðust þess að félagið fengi ekki lengri greiðslustöðvun, heldur yrði sett í þrot.

Ragnar H. Hall, lögmaður Baugs Group, segir þessa niðurstöðu vitanlega ákveðin vonbrigði. Ekki er mögulegt að kæra niðurstöðu héraðsdóms til Hæstaréttar og hún er því endanleg. Fram kemur í úrskurði héraðsdóms að skuldir Baugs Group umfram eignir hafi verið um 148 milljarðar króna í janúar. Baugur skuldar Íslandsbanka tæplega 6 milljarða króna, og Glitni um 42 milljarða, að því er fram kom við flutning málsins í héraðsdómi.

Ekki náðist í gærkvöldi samband við Jón Ásgeir Jóhannesson, einn aðaleigenda og fyrrverandi stjórnarformann Baugs, sem er erlendis. Á visir.is var í gær hins vegar haft eftir Jóni að honum liði hræðilega eftir tíðindin. Hann færi ekki ofan af því að sú áætlun sem stjórn Baugs hefði sett fram í janúar sé langbesta leiðin til að vernda verðmæti eigna Baugs.

Þá sagði Jón á visir.is að gjaldþrot Baugs myndi ekki hafa áhrif á félagið Haga, sem meðal annars rekur Bónus og Hagkaup, eða á fjölmiðlafyrirtækið 365 sem er að stórum hluta í eigu Jóns og gefur meðal annars út Fréttablaðið.

Jóhannes Jónsson, faðir Jóns og Kristínar, sem einnig er í útlöndum, vildi ekkert tjá sig um málið þegar rætt var við hann í gær.

brjann@frettabladid.is

gar@frettabladid.is