Spurði hvort þingmenn væru blindir

Nokkuð snarpar umræður fóru fram á Alþingi í dag um dagskrá þingsins. Sjálfstæðismenn eru ósáttir með þau mál sem eru á dagskrá og vilja m.a. frekar leggja áherslu á frumvarp um uppbyggingu álvers í Helguvík en breytingar á stjórnarskrá. Þingflokksformaður Framsóknarflokksins spurði hvort menn væru blindir á sama tíma og fyrrum menntamálaráðherra sagði hana senda vond skilaboð til suðurnesjamanna.

Guðlaugur Þór Þórðarson þingmaður Sjálfstæðisflokksins sagði dagskrá þingsins í dag taka á öllu öðru en heimilinum og fyrirtækjunum í landinu eins og ríkisstjórnin lofaði þegar hún tók við völdum.

Árni Páll Árnason þingmaður Samfylkingar sagði leikrit Sjálfstæðismanna sífellt verða skrítnara og það væri vilji sjálfstæðismanna að drolla og tefja málin, það væri ekki það sem fólkið í landinu vildi.

Birgir Ármannsson þingmaður Sjálfstæðisflokksins nefndi þrjú mál sem flokkurinn vill að verði sett í forgang. Nefndi hann þar atvinnuleysistryggingar, auknar heimildir saksóknara og frumvarp Iðnaðarráðherra um uppbyggingu álversins í Helguvík. Hann sagði flokkinn vilja geyma stjórnskipunarumræðuna þar sem vitað væri að hún tæki langan tíma og hin málin væru brýnni.

Síf Friðleifsdóttir þingflokksformaður Framsóknarflokksins hvatti forseta til þess að halda einbeitingu sinni og tryggja framgang frumvarpsins sem snýr meðal annars að stjórnlagaþingi sem flokkurinn hefur barist fyrir.

Hún spurði hversvegna flokkurinn vildi koma á stjórnlagaþingi og svaraði því sjálf til að það væri meðal annars til þess að gera leikreglurnar í samfélaginu yrðu skýrari og til þess að koma á meira lýðræði í samfélaginu.

„Það er það sem fólkið í landinu er að kalla eftir. Eru menn blindir í þessum sal? Auðvitað á að klára þetta mál," sagði Sif og bætti því við að framganga sjálfstæðismanna væri verri en þegar Vinstri grænir voru í stjórnarandstöðu og töfðu framgang mála.

Þorgerður Katrín Gunnarsdóttir sagði að Sif væri að senda vond skilaboð til suðurnesjamanna með því að vilja frekar ræða þessi mál en atvinnuuppbyggingu í Helguvík.

Nú fara fram óundirbúnar fyrirspurnir á Alþingi.