Íslensku kolmunnaskipin lögð í haf á ný

Íslensku kolmunnaskipin, sem legið hafa í höfn í Færeyjum síðan fyrir helgi vegna brælu á miðunum suður af Færeyjum, eru lögð af stað á ný og eru um það bil að komast á miðin.

Áður en veður versnaði var all góð veiði á svæðinu og höfðu nokkur skipanna landað fullfermi þegar veður versnaði. Veðrið var svo vont í Færeyjum um helgina að það þurfti að kalla út mannskap til að binda skipin betur. Töluverðar frátafir eru jafnan frá veiðum á þessu hafsvæði á þessum árstíma vegna óveðurs.