Fésbókin getur verið varasöm fyrir börn

Samskiptasíðan Facebook getur verið vettvangur fyrir nettælingar og er auðveldur aðgangur kynferðisafbrotamanna að börnum er áhyggjuefni. Lokað hefur verið fyrir aðgang dæmdra kynferðisafbrotamanna að síðunni.

Facebook samskiptasíðan, sem nefnd hefur verið Fésbók á íslensku, er gríðarlega vinsæl og síðustu vikur hafa börn einkum verið áfjáð í að setja upp sína eigin síðu. Margir hafa kynnst því að viðkvæmar upplýsingar eða myndefni sem hefur birst, hefur komið sér illa seinna meir.

Guðberg K. Jónsson verkefnastjóri hjá SAFT segir félagið heyra dæmi um nettælingu á Facebook, svipað og áður hefur sést á msn.

Með nettælingu er átt við að fullorðinn einstaklingur, sem yfirleitt villir á sér heimildir, setur sig í samaband við barn á netinu og reynir að byggja upp trúnað, sem síðar leiðir til kynferðisathafna, til dæmis í gegn um vefmyndavélar. Árið 2007 var lokað á 30 þúsund nafngreinda kynferðisafbrotamenn á Myspace og nú er einnig farið að bera á þessu á Fésbókinni.

„Við höfum tilkynningar frá Facebook um að þeir hafi hent út kynferðisafbrotamönnum sem hafa skráð sig undir réttu nafni, þannig að þeir sem eru örlítið greindari sigla þar undir fölsku flaggi. Við höfum einnig tilkynningar um að fólki hafi verið hent út út af tælingu á netinu," segir Guðberg.

Mikilvægt er að stillingar séu þannig að lokað er á aðra en þá vini sem notendur velja sér og foreldar eiga að skilgreina aðganginn með börnum sínum. Mælt er með því að foreldrar eða forráðamenn setji upp sína eigin síðu svo þau viti hvað verið er að tala um.

Frekari upplýsingar eru á www.saft.is