Mótmælt þegar þing kemur saman á morgun

Raddir fólksins boða til friðsamlegrar mótmælastöðu við Austurvöll á morgun þegar Alþingi kemur að nýju saman eftir jólaleyfi. Hörður Torfason, einn af forsvarsmönnum samtakanna, segir að fjölmargir hafi þrýst á að boðað yrði til aðgerða á morgun.

,,Við hvetjum til friðsamlegrar samkomu við Alþingishúsið og ætlum að láta þessa fulltrúa, sem þykjast ekki vita af okkur, vita af okkur. Við ætlum að hafa gaman af þessu og búa til hávaða, meðal annars syngja," segir Hörður.

Þingi var frestað 22. desember og kemur saman á nýjan leik á morgun. Þingfundur hefst klukkan 13:30 á óundirbúnum fyrirspurnatíma sem forsætisráðherra, menntamálaráðherra, fjármálaráðherra, umhverfisráðherra og viðskiptaráðherra verða viðstaddir.

Mótmælastaða Radda fólksins hefst klukkan 13.