Snjóflóðahætta í Bolungarvík - hús rýmd

Veðurstofan í samráði við lögreglustjórann á Vestfjörðum hefur lýst yfir hættustigi í Bolungarvík á reit 4 og er rýming hafin. Þetta á við um húsin Ljósaland 2, Traðarland 18, 21, 22 og Tröð. Gert er ráð fyrir að umrædd hús verði mannlaus fyrir klukkan 20 í kvöld, að fram kemur í tilkynningu frá Kristínu Völundardóttur lögreglustjóra á Vestfjörðum.

Ástæða rýmingarinnar er vegna þess að undir þeim snjó sem fallið hefur undanfarna sólarhringa er afar veikt lag sem valdið hefur því að snjóflóð hafa verið að falla, eitt og eitt á svæðinu og var síðasta þekkta flóð sem féll í dag, úr Hádegisfjalli í Bolungarvík.

Í nótt verður vindátt úr norðaustri með 15 m/s og úrkomu. Með þeirri úrskomusöfnun sem hefur átt sér stað í Traðargili og þeirrar sem er að vænta í kvöld og nótt ber að rýma hús á reit 4.

Fólk er beðið um að virða ákvarðanir um rýmingu og vera ekki á ferðinni um svæðið fyrr en hættustigi er aflétt.