Ekki kappsmál að koma þingmannsstól undir eigin rass

Bjarni Harðarson, bókasali og fyrrverandi þingmaður, segir að það sé ekki kappsmál að koma þingmannsstól undir eigin rass. Tilkynnt var í dag að Bjarni mun skipa fyrsta sætið hjá L-listanum í Reykjavík norður.

Bjarni segir á heimasíðu sinni að ástæðan sé einföld. ,,Ég tel mig geta gert L-listanum mest gagn með því fara fram í stærsta kjördæminu. Það er auðvitað þannig að við eins og öll ný framboð glímum við 5% múrinn illræmda. Nái ég milli 5-10% fylgi hér í borginni þá aukast verulega líkur okkar á landsvísu."

Bjarni segir að hann taki ögn meiri áhættu með því að bjóða sig fram í Reykjavík. Það sé honum mikið kappsmál að  fullveldissinnar eigi valkost í kosningunum í vor. Hann segir að þjóðin þurfi að sleppa undan ægivaldi stjórnmálaflokkanna.

,,Einhverjum þykir máske skrýtið að jafn ötull talsmaður landsbyggðar bjóði sig fram í Reykjavík en ég er mjög elskur að þessari borg og borgin heldur ekki stöðu sinni nema landsbyggðin þrífist."