Styttist í verkfall breska póstsins

Verkfall starfsmanna konunglega póstsins í Bretlandi hefst 22. október, á fimmtudaginn í næstu viku, semjist ekki fyrir þann tíma. Stéttarfélag póstsins lagði tillögur að samkomulagi fyrir stjórnendur hans í gær með þeim orðum að nú gæfist stjórnendunum færi á að afstýra allsherjarverkfalli, byggja traust viðskiptavinanna upp á ný og laga þau innanhússmál sem starfsfólkið telur brýnast. Amazon.com-vefsölufyrirtækið er þegar farið að semja við samkeppnisaðila konunglega póstsins en sendingar fyrirtækisins eru verulegur hluti alls pósts í landinu.