Frægir tapa milljörðum

Árlegur listi Sunday Times yfir ríkasta fólkið í afþreyingarbransanum er nokkuð merkilegur. Ekki síst fyrir þær sakir að eignir og fjármunir þeirra hafa rýrnað umtalsvert.

Samkvæmt Ian Coxon, blaðamanni Sunday Times, hafa tónlistarmenn og áhrifafólk í afþreyingarbransanum tapað að meðaltali tíu prósentum af verðmætum sínum. Munar þar mestu um ört lækkandi fasteignaverð og svo hlutabréfahrunið beggja vegna Atlantshafsins. Þannig telst Sunday Times til að Elton John hafi glatað rúmlega fjórðungi af veldi sínu en hann á þó enn fyrir salti í grautinn; eignir hans eru metnar á 175 milljónir punda eða 33 milljarða íslenskra króna.

Heimskreppan beygði ekki fram hjá Sir Paul McCartney sem tapaði sextíu milljónum punda eða ellefu milljörðum íslenskra króna. Jafnvel ungar stjörnur á borð við Amy Winehouse og Katie Melua lentu illa í því þegar bankar og fjármálafyrirtæki fóru á hausinn, eitt af öðru, því nánast helmingur auðæfa þeirra þurrkaðist út. Coxon vekur hins vegar sérstaka athygli á Robbie Williams sem er sagður hafa tapað 25 milljónum punda eða fjórum milljörðum. Tapið hjó nokkuð nærri Robbie.

Hins vegar voru nokkrir sem græddu á árinu. Þeirra á meðal var hinn kjaftfori Simon Cowell sem sá veldi sitt vaxa um sjö prósent og svo er það Judy Craymer sem framleiddi ofursmellinn Mamma Mia! Auður hennar jókst um þriðjung.