Nýr Suðurstrandarvegur opnaður að hluta

Suðurstrandarvegur er orðinn frægur fyrir að vera kosningaloforðið sem alltaf er skorið niður. Tveir kaflar eru þó tilbúnir, kafli næst Grindavík var fyrstur, og nú hefur bæst við kafli næst Þorlákshöfn. Í vinnslu er kafli milli Krýsuvíkur og Selvogs en það er hins vegar búið að skera niður lokaáfangann, sem bjóða átti út í haust. Niðurskurðarsagan heldur því áfram en veginum var fyrst lofað í tengslum við kjördæmabreytingu fyrir áratug þegar Sunnlendingar og Suðurnesjamenn voru spyrtir saman í Suðurkjördæmi.

Rennisléttur malbikaður kafli, sem opnaður var í vetrarbyrjun, meðfram ströndinni milli Þorlákshafnar og Selvogs, er sárabót, en samtímis var gamla veginum yfir Selvogsheiði lokað. Með þessu styttist leiðin um fjórtán kílómetra, auk þess sem Þorlákshöfn komst ef svo má segja loks í alfaraleið.

Ólafur Áki Ragnarsson, bæjarstjóri Ölfuss, segir að ferðaþjónustuaðilar gleðjist nú mjög. Það sé þegar tekið að lifna yfir ferðaþjónustunni.

Verktakinn, KNH á Ísafirði, lagði nýja veginn en á hann á eftir að klára kafla um Hlíðarvatn og Herdísarvíkurhraun. Verktakinn gerði hlé á verkinu í haust og flutti mannskapinn í Vopnafjarðarleið en áformar er að halda áfram eftir áramót og klára kaflann milli Selvogs og Krýsuvíkur næsta sumar. Þá verður aðeins eftir lokakaflinn, milli Krýsuvíkur og Ísólfsskála.

Ólafur Áki segir að 18 kílómetrar standi þá eftir. Öll gögn séu tilbúin, hönnun og útboðsgögn, og kveðst ekki trúa öðru en það verði klárað. Annars verði þetta stærsti botnlangi á Íslandi.