Atvinnuleysistryggingasjóður tæmist að öllu óbreyttu

Atvinnuleysistryggingasjóður þarf að óbreyttu að greiða allt að 26 milljarða króna í atvinnuleysisbætur á þessu ári. Sjóðurinn mun tæmast á næsta ári ef ekki kemur til aukið fjármagn frá ríkinu.

Greiddar atvinnuleysisbætur um síðustu mánaðmót námu tæpum tveimur milljörðum króna og hækkuð um 60 milljónir frá fyrri mánuði.

Það sem af er þessu ári hefur atvinnuleysistryggingasjóður greitt út rúma sextán milljarða króna í atvinnuleysisbætur. Að óbreyttu munu heildarútgjöld á þessu ári nema um 26 milljörðum króna.

Til samanburðar má nefna að niðurskurður og skattahækkanir ríkistjórnarinnar á þessu ári eiga að skila um 22 milljörðum króna í ríkiskassann.

Í júlímánuði voru tryggingagjöld og iðgaldagreiðslur fyrirtækja hækkaðar til að mæta vaxandi kostnaði vegna atvinnuleysisbóta.

Gissur Pétursson, forstjóri Vinnumálastofnunar, sagði í samtali við fréttastofu í dag að núverandi fjármögnun atvinnuleysistryggingasjóðs muni þó ekki duga til að mæta útgreiðsluþörfinni á næsta ári. Því verði að koma til viðbótar greiðsla frá ríkinu.

Sjóðurinn muni þó halda áfram að greiða út atvinnuleysisbætur í samræmi við yfirlýsingar ríkisstjórnarinnar um að tryggja áframhaldandi fjármögnun sjóðsins.